Конечно еден вистински зимски ден. -8 степени во 6 часот, а ние сме веќе договорени да трчаме на Водно почнувајќи во 9 часот. Другите гледаат со чудење на ваквиот потег, навидум екстремен и непромислен. Но вистината е сосема поинаква! Тоа е само потег која ја покажува посветенсота кон спортувањето и бескрајната љубов кон спортот. Истовремено, овој потег ја покажува и одличната форма во најтешкиот дел од сезоната. Ветерот беше остар, а студот не дозволуваше повеќе од неколку минути да бидеме без зимските ракавици. За другата зимска опрема и да не кажувам дека беше неопходна.

Средно Водно- Марково Крувче-Средно Водно-Пантелејмон-Средно Водно.

Лесно истрчани околу 15 км на убавиот снег во планински услови. Забораваш дека на само 30 минути од тебе се наоѓа загадениот главен град. Задовослтво беше огромно како за време на трчањето, така и по завршувањето. Среќен дека можам да трчам во секакви услови. Уште посреќен што моето здравје ми го овозможува тоа! Најсреќен кога тоа се прави во група со истомисленици и вистински љубители на трчањето.

По завршениот тренинг со времетраење околу 1 час и 20 минути, време е заслужено да си одиме дома. Сепак, денешниот мој спортски план малку отскокнува од вообичаениот. Ретко се пропушта оваа снежна прилика да се испешачи уште некој километар до врвот на Водно по асфалтниот пат. Тренингот и задоволството да се пешачи и ужива со драгата личност го достигнуваат највисокото ниво! По патот нагоре сретнуваме и други љубители на снегот и чистиот воздух. Најразлични профили, најразлични карактери кои си го живеат својот филм на начин кој ги прави среќни. Помеѓу толку многу луѓе препознавам и други вистински љубители на спортот како шетаат. Ние нагоре, тие надоле.

Го гледам добриот пријател, кралот на велосипедизмот, како пешачи со својата драга личност. Тогаш си спомнувам во себе: ''Денес бев поактивен од тебе на спортски план. Ти само пешачеше, исто како и јас сега. Но, јас денес веќе истрчав 15 км, а ќе испешачам уште дополнителни 14! Се насмеав и си продолжив да уживам освојувајќи ги убавините на Водно!''

Веќе сме на врвот и дојде време полека да се симнуваме. Излегувам од планинарскиот дом и во неверување го гледам токму него! Кралот на велосипедизмот е повторно на врв...со својот точак!

1 - 1 ! Или сепак... ти признавам. Твојата денешна спортска активност е далеку пред мојата! Среќен сум заради тоа! Овој ден ти ќе бидеш мојата наредна мотивација! Браво друже!

К.А. = А.К.